Umukobwa w'imyaka 18 witwa Gihozo Henriette afungiye kuri sitasiyo y'Urwego rw'Igihugu rw'Ubugenzacyaha RIB ya kamembe mu karere ka Rusizi, akurikiranweho icyaha cyo gukomeretsa bikomeye umusore witwa Hanyurimana Lazare w'imyaka 25, akoresheje urwembe. Ibi byabaye nyuma y'amakimbirane ashingiye ku rukundo, aho uyu mukobwa yashinjaga uwo musore kumwima urukundo kandi we amukunda.

Ibi byabereye mu kabari kari mu Mudugudu wa Kabeza, akagari ka Gihundwe, Umurenge wa Kamembe. Amakuru aturuka ku bari aho ubwo byabaga avuga ko Gihozo yasanze Hanyurimana mu kabari ari kumwe n'inshuti ze, atangira kumubaza impamvu akomeje kumwanga no kumwirenagiza kandi yagaragaje ko amukunda. Ngo yamubajije impamvu atemera ko bagirana umubano w'urukundo.

Ababonye ibyabaye bavuga ko Hanyurimana yamusubije mu buryo butuje, amubwira ko atiteguye kugirana umubano w'urukundo na  we wihariye, ndetse ko adafite gahunda yo gukundana na we. Icyo gisubizo cyababaje cyane Gihozo bituma hatagira kubaho guterana amagambo hagati yabo. Abari aho bavuga ko bahise batangira impaka  zikomeye, maze umukobwa yahise amukubita urushyi. Uwo musore na we ngo yahise amusubiza, bikurura akavuyo mu kabari, ariko inshuti zabo n'abandi bari aho bahise batabara barabatandukanya.

Nyuma yo gutandukanywa, byavuzwe ko Gihozo yasohotse mu kabari asa n'ufite umujinya mwinshi. Yagiye muri botiki iri hafi aho agura urwembe, agaruka mu kabari atunguranye. Abari aho bavuga ko yegereye Hanyurimana atamubwiye ijambo na rimwe, ahita amutemesha urwembe, amukomeretsa ku kaboko, ku kibero no mu gituza. Icyo gikorwa cyateje ubwoba bukabije mu bari aho, bamwe bagerageza kumutabara mu gihe abandi bahamagaye inzego zumutekano.

Inzego z'irondo n'iz'umutekano zahise zihagera, zisanga Hanyurimana ari kuva amaraso menshi. Yahise ajyanwa kwa muganga mu bitaro bya Gihundwe kugira ngo yitabweho n'abaganga. Amakuru aturuka kwa muganga avuga ko yakomeretse bikomeye ariko ubuzima bwe butari mu kaga cyane, akaba akomeje gukurikiranwa n'abaganga.

Gihozo yahise atabwa muri yombi, ashyikirizwa RIB ya Kamembe ngo hakorwe iperereza Ku byaha ashinzwa. Amakuru Ava mu  bugenzaccyaha avuga ko dosiye ye iri gutunganwa ngo ishyikirizwe ubushinjacyaha, kugira ngo hakurikizwe Amategeko.

Umunyamabanga Nshingwabikorwa w'Umurenge wa Kamembe, Ingabire Joyeux, yemeje ibyaya makuru, avuga ko ibi byabaye bitari bisanzwe, Aho amakimbirane akomoka Ku rukundo arangizwa n'urugomo nk'uru. Yagaragaje ko ubuyobozi bwababajwe n'ibyabaye, anibutsa urubyiruko ko urukundo Ari ubushake bw'umuntu Ku giti cye, si byiza kuruhata cyangwa kurusaba Ku ngufu.

Yakomeje asaba urubyiruko kwirinda ubusinzi no kwirinda imyitwarire ishyira ubuzima bwabo mu kaga, cyane cyane nko mu gihe Bari ahantu hahurira abantu benshi nko mu kabari. Yashishikarije Kandi abafitanye amakimbirane kwifashisha inzego z'ibanze n'iz'umutekano, Aho kwishora mu bikorwa by'urugomo bishobora kubakururira kugongana n'amategeko no kwangiza  ubuzima bwabo n'ubwabandi.

Abaturage bo muri ako gace bavuga ko batunguwe niyo myitwarire, kubera ko batakekaga ko amakimbirane y'urukundo atabyara urugomo rugeze kuri urwo rwego, bakomeza basaba ko hakorwa ubukangurambaga mu rubyiruko, Ku bijyanye no gukemura amakimbirane mu mahoro no  kubaho rumenya kubaha amahitamo yabandi.

Mu gihe iperereza rigikomeje, inzego z'umutekano ziributsa ko gukomeretsa kubushake Ari icyaha gihanwa n'amategeko, Kandi ko buri wese akwiye kumenya kugenzura amaranga ye no kumenya kubaha uburenganzira bwa bagenzi be.

Iyi nkuru yongeye kugaragaza ikibazo gikomeje kugaragara mu rubyiruko, aho amakimbirane ashingiye ku rukundo agenda afata indi ntera, rimwe na rimwe akavamo urugomo rukabije. Abasesenguzi mu by'imibanire bagaragaza ko urukundo rudashobora guhatirwa umuntu, kuko ari icyemezo gifatwa ku bushake bw'umuntu ku giti cye. Iyo umwe mu bakundana cyangwa ushaka gukundana n'undi atabyemeye, kubifata nabi bishobora gutuma habaho amakimbirane ashobora kuvamo ingaruka zikomeye nk'izi.

Hari kandi ikibazo cy'amarangamutima akabije mu rubyiruko, aho bamwe batabasha kwihanganira ko urukundo rwabo rutakiriwe neza. Ibi bishobora guterwa n'impamvu zitandukanye zirimo uburere, ubuzima bwo mu muryango, inshuti mbi cyangwa se kunywa ibisindisha bikabije. Mu gihe umunu adafite ubumenyi buhagije bwo kugenzura amarangamutima ye, ashobora gufata ibyemezo bihubukiyeho bishobora kumugiraho ingaruka zikomeye, zirimo no kugongana n'amategeko.

Abahanga mu by'imitekerereze y'abantu bagaragaza ko hakenewe ubujyanama buhoraho ku rubyiruko, cyane cyane mu mashuri no mu miryango, kugira ngo bigishwe uko bakemura ibibazo mu mahoro no mu bwumvikane. Ibi byafasha kugabanya ibibazo by'urugomo rushingiye ku rukundo, bikunze kugaragara mu rubyiruko rutaragira ubunararibonye buhagije mu mibanire.

Ku rundi ruhande, amategeko y'u Rwanda ateganya ibihano bikomeye ku muntu wese uhamwe n'icyaha cyo gukomeretsa undi abishaka. Iyo bigaragaye ko igikorwa cyakozwe ku bushake kandi kigamije kugirira undi nabi, bishobora gutuma uwagikoze ahanishwa igifungo n'izahabu bitewe n'uburemere bw'ibikomere yateje. Ibi bigamije gukumira ibikorwa nk'ibi no kurinda umutekano w'abantu bose.

Inzego z'umutekano zikomeza gushishikariza abaturage kwirinda ibikorwa by'urugomo no gukemura amakimirane binyuze mu nzira zemewe n'amategeko. Zibutsa kandi ko igihe cyose umuntu yumva afite ikibazo gikomeye cy'amarangamutima cyangwa amakimbirane n'undi, agomba kwegera inshuti, umuryango cyangwa inzego zibishinzwe kugira ngo abone ubufasha hakiri kare.

Abaturage bo mu karere ka Rusizi bavuga ko ibi byabaye bikwiye kubera isomo urubyiruko rwose, bakamenya ko gukoresha urugomo bidashobora gukemura ibibazo uko byaba bimeze kose, ahubwo ko byangiza ubuzima bw'ababigizemo uruhare bose. Basaba ko hakongerwa ubukangurambaga mu rubyiruko ku bijyanye n'imibanire myiza, kubahana no kubaha amahitamo y'abandi.

Ibi kandi bishimangira ko hari uruhare rukomeye rw'ababyeyi, abarimu n'abayobozi mu gufasha urubyiruko kumva neza agaciro k'ubuzima, kubigisha gukemura ibibazo mu bwitonzi no kubafasha kumenya ingaruka z'ibikorwa bibi bishobora kubakururira ibihano bikomeye. Iyo ubufatanye nk'ubu buhari, bishobora kugabanya cyane ibyaha bishingiye ku marangamutima akabije.

Mu gihe iperereza rigikomeje, benshi bagerageje kumenya umwanzuro w'uru rubanza, ariko ikigaragara ni uko ari isomo rikomeye ku rubyiruko, ryerekana ko amarangamutima atagenzuwe neza ashobora kuganisha ku byemezo bikomeye bishobora guhindura ubuzima bw'umuntu burundu.