Abarwanyi b'umutwe w'iterabwoba wa FDRL batwitse igiturage kiri muri Teritwari ya Walikale, mu ntara ya Kivu y'Amajyaruguru  muri Repuburika Iharanira Demokarasi ya Congo, Banica abaturage bane mu gitero cyabaye mu rukerera rwo kuri uyu  wa Mbere tariki ya 15  Ukuboza 2025.

Amakuru aturuka mu baturage avuga ko abo barwanyi bayobowe n'uwiyita General Mudayongwa bateye igiturage giherereye mu gace ka Busurungi,  muri Gurupoma ya WALOA  Loanda. Abo barwanyi binjiye mu giturage mu masaha ya mugitondo kare, batwika  amazu menshi mu gihe abaturage bari bakiryamye.

Izo mvururu zatume abaturage bagera kuri bane bahasiga ubuzima, mu  gihe abandi benshi bahungiye mu duce dutandukanye twa Kifuruka, Kaundju, Katambira na Busurungi, bahunga kubera ubwoba batewe n'ubugome bwakoreshejwe naba barwanyi ba FDLR.

Abaturage bo muri ako  gace batangaje ko icyo gitero cyari kigamije kwirukana abari batuye muri Gurupoma ya Waloa Laonda, aho Generali Mudayongwa avuga ko ubutaka bwabo ari ubwe. Bavuga ko uyu muyobozi wa FDRL asaba abaturage kwimuka ku ngufu, akitwaza ko ashaka guhinga no kororera kuri ubwo butaka yemeza ko ari ubwe.

Umwe mu baturage yagize ati: “Iyo abaturage banze kuva mu byabo, batangira guterwa ubwoba, amazu agatwikwa, bamwe bakicwa.”

Mu bapfiriye muri ibyo bikorwa by'ubugizi bwa nabi, harimo n'abarwanyi bo mitwe yitwaje intwaro ya Wazalendo, by'umwihariko abo mu mutwe wa Mai-Mai Kifuafua. Ibyo byatumye havuka imirwano ikomeye hagati y'abarwanyi ba FDLR n'abo muri Mai-Mai, irushaho guhungabanya umutekano w'abaturage.

Raporo zitandukanye z'Umuryango w'Abibumbye zagiye zigaragaza ko Leta ya Repuburika Iharanira Demokarasi ya Congo yakunze gushinjwa  gukorana cyangwa kwifashisha abarwanyi ba FDLR mu bikorwa by'umutekano, n'ubwo uwo mutwe uri ku rutonde mpuzamahanga rw'imitwe y'iterabwoba. FDLR igizwe ahanini n'abasize bakoze Jenoside yakorewe abatutsi mu Rwanda mu 1994, igakomeza  guteza umutekano muke mu burasirazuba bwa Congo.

Mu rwego rwo gushaka igisubizo kirambuye kuri iki kibazo cy'umutekano muke mu karere, u Rwanda na Repuburika iharanira Demokarasi ya Congo baherutse gusinya amasezerano y'amahoro i Washington DC, ku buhuza bwa Leta Zunze Ubumwe za Amerika. Muri ayo masezerano  harimo ingingo ishimangira ubufatanye mu guhashya no gusenya umutwe wa FDLR ufatwa nk'uhungabanya umutekano w'u Rwanda n'akarere muri rusange.

Abaturage bo muri Walikare bakomeje gusaba ko hashyirwa ingufu mu kubarinda, hagakurikiranwa abagize uruhare muri ibi byaha, kugira ngo amahoro n'umutekano bigaruke muri ako gace karanzwe n'intambara ihungabanya umudendezo wabo.